名古屋一個窿:游泳操

好可能係只此一家．

係．係游泳操．即係如果你有上過訓練班，落水前要一齊做熱身果一種．唔同o既係，大概每個鐘做一次．就响上個星期日發生．

之前果日37度，終於令我捨得駛500 yen响日本游第一次水．其實同响香港游水大致一樣．但細節就幾唔同．比如，唔可以戴錶或首飾，一定要戴泳帽等．不過最特別都算係每個鐘全人類離開泳池休息，跟住會有廣播．「一二三四，二二三四...」大家，係！係大家，就會跟住做熱身操．就我所見，幾十人之中只有一兩個人唔做．至於點解? 可能驚你落水會凍啩...睇下有冇機會問下人...

p.s. 泳池影唔倒相...
p.p.s. 結果，果日游左1400米，比以前响香港多400米...攰到震

名古屋一個窿：花火,也可以很moody

雖然星期四考試，但還是和同學去了看花火 (即我們講的煙花)

平常的花火讓人覺得鬧烘烘．不知為何，這張相有D moody．是因為前面個肥佬成日左右郁?係因為棵椰樹遮左D烟花?係因為仲有唔少野未温?開始明白早前kafailo講，烟花(對還是覺得這名字比較貼切）一個一個放上天，boom，boom，一下一下咁聽住D廻聲，同平時聽住鳯陽花鼓睇果D年初二烟花係有D唔同．

其實今次仲有D好簡單又好得意o既烟花，好似西瓜、章魚咁．

B觀點:衝勁

還在上班時，會習慣講：「算啦！係咁嫁喇」

不知不覺，變了條老油條．認為有時發力也沒用．是以為，基本的工作大概都上手了．會覺得悶．甚至覺得悶是理所當然．

早陣子，在一個表演中，看到她
不是美人，但她跳得很投入，身手敏捷，不比身邊至少年輕四十歲的人遜色．就是有一股勁．

好，也要努力的為月尾的考試努力．

名古屋一個窿:試用期

「今日就滿三個試用期喇！覺得我點?」

「...之前都聽人地話你咩都冇．都唔係吖」傻B想了一想後回答

「咁樣好似唔算讚喎」

「點講呢~雖然你有o既野人地都有，而人地仲有好多名勝，有大show又好少有你份．不過，就係咁就啱讀書囉．生活費又冇咁貴」

「咁即係讚人地電話有防盜功能咁啫．因為又老土又冇款」

「咁又即係講唔上有型，不過，hea下hea下都幾啱．好似Noritake公園，就啱飲下野，睇下書．德川園就可以等秋天响市區睇紅葉．想懷念下荔園又可以去東山動物園．當然，仲可以去你附近D地方玩啦」

「你講到我淨係hea下hea下o既地方」

「...咁唔夠咩」傻B回答


其實也不太正確．傻B再想一想後說:

「其實D人都幾得意，會碰到一D『你唔識日文！費事同你講』o既人，但又會碰到，唔介意浪費時間，同我用單字同短句溝通o既日本人，就好似橦木館碰上o既人．响學校度，又好似番左中五咁，大家都開始為唔同目標努力响宿舍度，起初一條人傻下傻下，又唔想羣番D講國話或者講廣東話o既人．哈！又會百分百中的碰上想學英文的日本人．話唔埋遲D仲可以去睇佢個『成人式』」

「你個『成人式』都變左『過去式』好耐喇喎... 仲有呢D好似唔關我事喎」

「唔係撞倒你，都唔會遇倒呢D人啦」

「係撞架咩?」

「都係架！點解唔揀東京?貴囉．點解唔揀北海道？去其他地方太遠囉．好在遲D都會home stay．四國？仲鄉下過鄉下喎．」

「by elimination (消去法）先揀到我...」語畢，名古屋氣頂得温度上昇．升到今天的31度．

而傻B，就去食呢度o既第一次甜品buffet慶祝，是也!

名古屋一個窿:梅雨天

日本的梅雨天比香港來得遲．大概6月起，7月止．有點像清明時節的雨粉．不過老師說，今年跟往常不同，梅雨季節的好天日子比平常多．也許秋天時會較多聽到水存量低於警界線．

話雖如此，上週還是差不多下了一整個星期的雨．只能作戶內活動．其中重要項目：讀書．

吊頸要「抖」下氣，讀書要偷下懶．就在去厠所時，發現躲在一旁不到外邊揾食的鴿子．是避雨吧．或許．雖然雨不是下得很大．總之就要「抖一抖」．不過想一想，自己又何嘗唔係．要等好天啊．