社區 支持小店

香港的確很方便，半夜兩點幾都可以行幾分鐘就買倒野食。方便的背後，好一部份來自大財團的便利店。

不過，有一群人寧願唔方便，也要支持小店。簡單講，就係唔想遲Ｄ冇晒本地小店。例如在天水圍的例子，因連鎖店進駐居邨商場，他們便多走幾步去隔離邨。

平常都習慣會去超市買東西，貪佢地開得晏，又多選擇。早前嘗試到小店，一句：「老闆，有冇XXX」，然後很自然的老闆就會話俾你聽用佢時有咩要留意。你一句我一句，很親切。

有人話大財團講句野都大聲Ｄ。的確。不過，我地可以盡少少力令情況唔再差落去。

當然，連瞓覺都唔夠時間就唔駛諗。


　

我自己 :即食藝術家

小時候，愛畫卡通公仔。叮噹、加菲貓。畫下畫下，時間容易過。
當然，係以前。

早前，趕潮流的去了一次art jam。
所謂art jam，講到底，就係一個地方有齊用具。

有一個問題是：「畫好放邊？」
香港地方細，唔通畫好之後就收埋佢？

之後，先諗「到底要畫咩？」

結果，我就畫左......






已經唔記得上次畫畫係幾時。依家做得最多係check email。

三個鐘，轉眼就過。睇住一塊白畫布變成一幅畫，睇住以前學過o既仲用得番，感覺很好。

當然，要自己買一套畫具就不用了。不知下次幾時。

就咁做個即食藝術家，感覺真不錯。

我自己：雪櫃

搬屋真是一闊三大，像亞媽說「咩都要多一套。」
跟獨居的同事講起，「可以買二手呀！」

原來很多人都在買賣二手傢俬電器。政府網站，商業網站，百花齊放。搬屋換傢電，用舊左，新屋送o既傢俬唔啱用，原因各異。而且新舊都有，我想買的雪櫃，甚至一百蚊唔駛都有一部。

而運作好簡單。睇啱貨品，網上留言，等電話或電郵回覆。有需要可要求物主上載照片。講啱價錢就約交收。

不過，動作一定要快。試過早上睇啱一個雪櫃，下晝三點約好駛交收，下晝五點就俾另一個人買左。經過一兩個星期，最後只好買個新雪櫃。

新雪櫃真係好可愛。好似有無限空間去放你最喜愛o既食物。

看著看著，想起自己也要在生活上騰出點空間。

p.s. 若果買得成二手電器，真係可以洗少少。

小時候：曲奇

「小時候每次都只能喝一小瓶益力多。
那時候想，若果可以一次過喝啤酒杯那麼多會是怎樣？
結果，在第一次part time出糧時，便實現了這個夢想。」

這是，日文老師的分享。

第一反應是覺得他很傻。再認真想，是麥當當的薯條。第一次吃，是小學時，媽媽帶著幾兄妹一起分一份薯條和漢堡。那時，很想一個人吃一包。那時，甚麼都得來不易。

早前，才想起還有它。

小時候，它每年只來一次。農曆新年時。從親戚手中送來。

還好，媽媽並沒像電視趣劇般把它轉送給其他親友。待新年過後，珍而重之的把罐打開。

每次，只會吃兩三塊。當然，還要跟家人分。那份牛油香味，真的叫人想一次吃個夠本。不過，吃完後又得要等一年了。

長大了，忘記了它曾經是如何的美味。

今年輾轉從媽媽手中收到一罐。一直都沒有打開。直到某個週未，想起老師講的話，想起小時候那每年一次的約會。又再一次珍而重之，每次只吃兩三塊。很滿足。

香港人：承傳

或許很久沒有參加過，覺得今年的六四集會跟從前不一樣。

同樣有激昂、非黑即白的口號。新領導更沒有舊的那份文人氣質。不過那不是唯一，台上台下似乎比從前有希望。台下，有九十後的情侶開玩笑、拍照；有父母帶著幾歲又或是十幾歲的小朋友，平靜地解釋著過去；有學生三五成群的來參與。台上，年輕的主持有幹勁的去鼓勵大家，不要忘記，同時亦要放眼現況。沒有愁雲慘淡，假以時日說不定會有節日氣氛。

朋友說，澳洲有記念大戰英雄的節日，也是歡天喜地的去慶祝，說不定有天我們也能。