小創作：伴

起初沒留意他。

某天，如常在進電梯後閉目養神。在門要關上的一刻，門彈開，見沒有人。不以為然的再將門關上。隨後，發覺每天都是這樣。試過在週末坐同一電梯，門沒有彈開。開始懷疑，是否他跟著進電梯。

又是一個加班後的晚上，電梯同樣遇到他。門關上後，鼓起勇氣告訴他今天老闆有多煩，我已打了多少封求職信。就這樣，我開始期待每天跟他在電梯傾偈。

那天，該是他的生日，我帶了禮物回家，電梯攀升沒多久後突然下隋，高興得以為他要接我離開，可惜只維持了一兩秒。

早上出門時發現電梯在維修，而自那天起，電梯會再也沒有彈開......

小創作: 改天帶你去東京

「亞仔聽日要默書。」
真不明白為甚麼要走到深水埗來吃一頓壽司。

已經不是要求他給一家人怎樣的生活，為甚麼他就不可以少給我一點麻煩？
怱怱結過賬離開。

「仲要走咁遠先到地鐵站...」
明知自己錯了，他總是這樣不發一言。

其實已很久沒有一家人外出吃飯，自從他失業開始。

走到地鐵站口，他輕聲的說「我以為你唔介意今日o黎」

「今日係咩日子呀～」
話才到咀邊，看看日子，今天是我們的結婚紀念日。而站邊路牌寫著「東京街」。
跟他拍拖時，他說過有天要帶我到東京，一轉眼，已十年。

小創作: 老.唔老 之下集大結局

以為上集已經講完。

星期二跟DSM溝通過後，以為已告下段落。星期六，也是「即管去睇睇啦」的心態去看綵排。
然而，眾人都萬二分努力，先有依然認真的演員S，連當初似分身不暇的演員P，也很投入，還有DSM找來「估佢唔倒」的《愛情陷阱》做電話鈴聲。


演出開始了。作為一個編劇，原來也會有心跳的感覺。畢竟，這可能是唯一一次在台上看這個短劇。然後，演員的「放」，讓觀眾很快便投入情緒，設計了的笑位都有反應，該有味道的亦是。作為編劇，最滿足的也莫過於此。

不過，演出還是有驚險的，特別是演員忘記對白，因為，誰都幫不了他們的。
起初還以為演員S會緊張，最後，在歷時近十秒的Dead air中，是她「執生」了。也幸好劇中人正在一個尷尬位，看來也不會太不自然。

平心而論，只有幾天的綵排，三位演員都演得有水準。而他們在綵排時，更把對白，改得比原本的「正」。

演出過後，跟一眾團隊到台上謝幕，感覺良好。
沒有這個課程，不曉得甚麼時候才組倒班去演一次。

雖然只跟這班台前幕後相處了幾小時，但感謝他們的認真。
得告訴他們，有觀眾跟我說，喜歡他們的演出。

也因為他們，今天收到了這個訊息。

還記得當天面試時，說自己的故事，連自己再看也覺得悶。雖然還不太肯定是否已解決了這個問題，但得到這個鼓勵，會繼續努力。

小創作: 老.唔老

今年也放了一個短短的暑假。一個上課的暑假。

一個月前開始了準時六點下班，為的是趕給七點開始的編劇班。放下上班的壓力，與一班還有興趣「講故仔」的同學聽講、討論。單純的目標，是一個10分鐘的劇本，八月尾公演。

從來批評都容易。要自己把故事說得引人入勝又是另一回事。上課前準備的故事，半路中途已發覺用不上。新的構思，又複雜得自己都未了解故事角色。結果，最後一堂，大家都拿著完成了的第一稿交換意見時，手上只有一個簡單的概。

未知下次幾時。如是者，死線前的每一天都努力的去寫。聽導師、朋友的意見，一星期就改了三遍。結果雖然仍有不足，但交到演出團隊的一稿總算不太犯駁。

因導演班開不成，10 個團隊演出由兩個導師帶領。有些編劇同學決定親身執導。我就只好趁唯一一次跟演員見面時，儘量講清楚故事的理念。難得遇到一個認真的演員，願意了解每一句對白的意思。聽說，這是她主動爭取回來的角色。

晚上，再構想舞台的要求，發給後主。感覺有點似當年有演出，久違了的體驗。

演出將在這個星期六。因票務安排仍未清楚，未必可以讓大家參與，看過之後再給大家分享吧。


p.s.　寫起的這個短故事叫《老。唔老》

短篇: post

米高很多朋友，也很忙。
多得facebook，開心不開心，吃過那一家餐廳，看過那齣戲，都可以跟朋友分享。米高再忙也會不停的更新。
最近，facebook增強了功能，米高急不及待去查看，到底朋友最愛看他的那一種分享。
「０」

短篇: 收唔倒

早排同佢要部iphone，今日終於收到。
之不過，同網上見倒好唔同，而且，呢度又冇Apps Store。
不過睇過新聞，似乎遲D有機會有...... 唔知佢幾時落黎?

短篇：記事簿

把積壓了很久的事情做完了．早前還擔心，自己記性越來越差．把事情都井井有條的記進記事簿．這時見你笑咪咪的走過來說：「放了在我那邊呀...」

短篇：短訊

今天在搜查早前失踪男生的通話記錄時發現，男生在情人節前發短訊示愛，對方沒有回覆．
因懷疑跟對方有關而致電，發現她正在等男生致電，而她早於幾天前用網上即時短訊回覆了...

小創作: on and on (2 / 2)

第五 (觀眾)

「唔好氣餒喎」留言o既,係當初問我有冇blog o既網友.

心感安慰,起碼我唔係對空氣講野. 心情好左D,出去逛下商場.咁「橋」撞倒一個中學同學.「唔得閒都同大家見過面打個招呼」原來今晚同同學聚會就o係呢度.之前都唔想去,點知都係避唔甩.

只係10年多D,個個都唔同晒,有「身光頸靚」的,有提早步入中年的, 大家坐下來, 不像剛畢業時不斷在考專業資格.意氣風發的都在講炒樓炒股,賺幾多.就係怕會係咁場面.還是盡快打完招呼離開.

「我呢期都追睇緊一個失業blog」亞芬.中學時的班長.原來最近半年都失業.席間即時有兩三個人表示有追看.其實都有衝動話個blog係我寫.但三思後都係盡快離開.


第六 (熱爆)

雖然只係幾個人,但係都有D飄飄然.唔怪得之咁多人恨做明星. 打開電腦想繼續寫之際,發現有好多人留言鼓勵.仲有雜誌email約我做訪問.

「對於人稱『失業紅人』呢個現象,你點睇法?」原來,有幾個forum轉載左我個blog,近一兩年又有為數不少就業不足同失業大軍.認為我個case代表左呢個世代.雖然我唔知點解吹得咁大. 個記者就話外國有好多人寫blog發達,又問我係咪多年來堅持理想.仲鼓勵我出書添!

佢講開理想,我先諗起早排執屋睇返細個留底o既作文.細個果陣我話自己想大個都講古仔.唔通真係可以靠講古仔養自己?原來我咁樣返左咁多年工就係等今日.

我一邊幻想將來會點樣飛黃騰達,一邊開始諗計令個blog寫得精采D,公司打黎叫我做freelance,有見工機會,都成為我個blog內容.而同時,開始有email寄黎提議事情應該點發展,如應該如無線電視劇般有三角關係等.我開始覺得自己係一個專業作家,仲係紅果隻.


第七 ()

如是者半年,公司當然冇freelance,不過好在有寫blog. 又有讀者.當稿件累積到一定數量之後,我決定打電話俾之前訪問我個記者.

「唔知你有冇法子幫我出書」

有佢幫手搭路,實掂啦! 點知,到頭來佢只係俾左兩三個出版商聯絡方法我. 直接聯絡過他們後,轉眼又過幾個星期,送稿後都冇迴音. 難得十幾年都未試過咁上心做野,我決定自己出. 仲搭到路去書展擺.

結果,在書展賣出了10本,都是一些forum上認識的網友.「其實好多人想支持你,不過大部份文章我地都?網睇過,而且又仲?緊工」

在書展收拾的那天, 一個書商告訴我,坊間有幾個同類形blog.叫我可以參考下.據說,其中一個係專業作家化名寫的.

倒頭來,還是要重新開始

小創作: on and on (1 / 2)

第一 (想做咩?)

「大個左要做咩?」小學三年班的老師問
「講古仔,畫公仔」我這樣回答.

「點解你會想教書?」
「講o下講o下又一日,又多假期,又早放工,仲年年都只要講同一份note」初中年代跟死黨說.

「點解想o黎做?」
「我好鐘意寫program嫁!又覺得份工作好有挑戰性」第一次見工時這樣回答,唔通話當時最好pay係佢咩


第二 (Office生活的最後一天)

「你俾我中左六合彩,睇下仲見唔見我?」我這樣的回答這位剛轉組、才畢業半年的同事.

帶著他在office走,正要介紹眼前的同事,才發現忘了這位採購同事的名字.在裏5年多也沒講多過半句,難怪.

一班同事正在討論網上購物流程,不同情況的處理,看來有點hea. 互相介紹後, 當新同事想發言之際,秘書進來叫大家開臨時大會.心想,慌唔係老闆又有咩新idea,一切推倒重來咩

「因為經濟氣氛急轉,公司將專注發展投資,網站開發將轉以共同開發模式」好聽D,全部人即時變為公司partner,實際D,就係freelance,有job時公司就call我地,冇job就你死你事.

枉我仲忍左咁多年留底咁耐.


第三 (得閒)

公司個幾星期都冇job,返緊工時就趕趕趕,而家就忽然攤咁耐.

一時間多咁多時間,都唔知做咩好. 平日想唔駛做,但30出頭就早左D.唯有日頭自己一條友逛商場,夜晚就上網hea下.

平日減壓都靠shopping,不過依家齋睇,不到一星期已膩.某日去麥記過日神,旁邊的媽媽品神咁叫個小朋友做功課,小朋友點左亞媽去買野,我話俾個細路聽,讀左書都唔代表咩.哥哥大學畢業,結果都唔知自己做咩.點知小朋友仲醒過我,「我好清楚嫁.咁依家要靠屋企養嘛.你呢?悶到要撩細路傾偈,攪咩」

攪咩?我咩都唔想攪.

返屋企上o下forum留言.有網友見我成日留言,問我有冇blog,佢話佢都寫緊個旅行blog.我都想寫下自己點樣風花雪月,但係我連食飯都揀下午茶時間買埋兩餐...

「咪寫下失業囉」

我係freelance,唔係失業...


第四 (失業blog開張)

第一篇: 「freelance的生活,每天都等待挑戰 (句號)」

第二篇: 「freelance繼續在等待他的挑戰.十分期待」

第三篇: 「freelance的挑戰.原來是對未可預知未來的等待」

真係寫寫o下先發覺自己唔記得中文點寫.中五以後都唔駛寫. 題目就仲唔知點.第四篇到底要寫咩,總唔可以十篇都期待.今日發生過咩事?咪同之前一日一樣...

第四篇: 「freelance主動出擊,打電話到客戶公司問o下有冇job,但係唔夠5分鐘就俾秘書hea走......其實我唔應該咁傻打番去.」

不如就寫下見工經驗?

第五篇: 「freelance想了解市場,決定扮見工.上網睇睇,原來依家咁多巧立名目o既資格...」寫寫下,第五、六、七篇, 講下點過日神,又講下點揀工, 點寄求職信,又點樣石沈大海.

某天電話響起, 「今個禮拜方便黎見工嘛?」終於有工見.都四五年冇見過工,似樣D o既西裝都冇一套.到場仲慘.又緊張,又要講幾年都冇講過o既英文,最慘仲係,對方又嫌我貴又嫌我D skill outdate晒.

其實佢有冇睇清楚我份CV嫁,唔請咪唔請囉,駛唔駛踩得咁盡.就係咁將一肚氣寫晒落個blog度.

不過又會諗,點解攪成咁.咁多年循規蹈矩,又冇練精學懶...

(to be continued)

三個外星人 - Part 6: 同事來電 (完)

回程路上，Kate跟我並沒有對話．不過，我似乎開始明白Kate為甚麼會選擇在地球工作．

「今日就係想俾你睇咁多」是Kate先打沉默．並在背包拿出一支水．
「拿D野先」

我飲過後，Kate同我講「唔好意思．因為我地唔可以俾你將呢度o既事同其他人講，所以要俾你飲．放心，唔係毒葯，只係當你向其他人講及呢度o既事先會發作，令你忽然變老」

咁即係點．嚟之前冇講過要服毒．更冇諗過cute cute地o既Kate會咁對我．

「其實你唔駛擔心，若果你鍾意留响度，跟本就冇問題．」Kate不經意的講．

雖然响被騙情況之下飲左唔知咩野．只不過，撇開呢個問題，依然覺得可以一試留底响度．
「咁...　返地球係咪同嚟o既時間一樣?」
「其實好似你去澳門咁．」

就係咁，我就開始左响外星o既生活．成為呢個星球上面o既外星人．

經過一段時間訓練，我已經開始同當地人一樣，可以用佢地o既方式溝通．工作亦漸上軌道．長假期會返屋企見下家人．

响呢度工作同地球唔同，溝通咁快o既原因之一係，大家做事都會跟規矩做事，所以基本上都唔特別要溝通．之不過，漸漸發現，因為這裏一切講求效率，變得工作比從前時間更長．到一個程度，工作以外沒有任何其他時間．

某天，坐在電腦前回覆電郵，收到一個同事的來電．

三個外星人 - Part 5: 球場上的小朋友

電話响起．是朋友傳來的電郵．雖然只是普通的轉寄電郵，但明白仲同家人朋友保持聯絡時心情會輕鬆點．

Kate這個地方，似乎比我們先進．不明白Kate為何要走來跟我們工作．

「我帶你去睇一間學校．」Kate邊帶著我行邊說

學校都好睇?不曉行這個星球有多大，但我們是用走路去．街上的人都沒有甚麼對話．除此以外跟平日的街景沒有兩樣．

「你睇下前面」Kate示意迎面走來的一對男女．

女的停在其中一廚窗前，看了一看．男的不消一會便走進了那商店．手上拿著一件禮物出來．女的看到，開心的接受了．

「你覺得點?」Kate問
「都幾sweet呀，個女仔都好受啊」
「或者啦．不過個男仔係因為知道個女仔諗咩先入去買，而個女仔亦都知道個男仔入去做咩」
「都係同一件事」
「唔同，自發去做同人地叫你做o既分別．响地球，同樣情況，個男仔都可能仲未知發生咩事．所以，若果個男仔真係送禮物俾個女仔，個女仔真係會好開心」

係因為地方唔同，定係男女有別?

來到了學校．跟在街上情況不一樣．小朋友在玩得盡情時高聲叫，會開玩笑．會奔跑追逐．

「你睇下前面」Kate示意球場那邊．

球場上，有幾個人分散的站在球場內．

「佢地應該係因為鬥咀，而要俾分隔．咁樣，佢地就感覺唔到對方諗咩」Kate在解釋
「原來你地心靈感應有距離限制」
「你叫係咩都好，如果唔分開佢地，佢地唔識控制自己，好快就會『郁手郁腳』．不過，响學校佢地就會慢慢學點樣感覺對方，點樣控制．我地細個都係咁」

三個外星人 - Part 4: 唔講fashion講身裁

Part 4: 唔講fashion講身裁

早十年個個都話移民，當年就冇諗過．估唔到依家一去就去左咁遠．好似只係過左幾個鐘，就去到一個橙色天空o既星期見工．其實都唔錯．Kate冇講錯，其實都好想揾過份工．若果唔係天空顏色唔同，我會以為自己冇離開過．

第一個目的地係一座普通商業大廈．到左七樓o既辦公室．Edwin先入左去．而Kate就陪我响接待處等．

第一感覺是很寧靜．雖然很忙，但大家都似是很清楚要做甚麼．而當然，也是沒有對話．

又是一陣音樂，Kate示意要跟著大家一齊走．大家就向同一個方向走．是一間房間．原來是會議．同樣的寧靜，同樣有報告投影．偶爾有人舉手，但同樣，沒有發言，就是這樣過了幾分鐘．大家似是放鬆了的離開．

「完左」Kate終於開聲．「係咪同我地平日開會好唔同」
「如果我地每日都可以坐兩分鐘就開完一個會就好」平日D會，冇一個鐘都唔駛出門口．
「佢地已經傾完，舉手o既人就己經發表左意見」
「又係心靈感應?」
Kate沒有打算再回應．當走出會議室，才留意到大家的衣著接近一式一樣．
「係制服?」對Kate講話完來可以好簡短．
「唔算係」

Edwin從走廊另一邊示意我們進去．
「我地當傾下偈咁就得，你唔需要當我會明白你諗緊咩．」坐低後Edwin對我講．
我開始嘗試唔去諗．唔諗對方咪唔知你諗咩囉?

「頭先覺得點?」Edwin再問
「好有效率．如果我地開會都係咁就好．」
「就係要咁先可以．」
「不過我就完全唔知道佢地講咩．」
「你留底耐左就會明白．」
「係呢，頭先留意倒，大家好似著制服咁，呢度其實係一間咩公司?」

據Edwin講，原來用我地詞匯講就係纖體公司．响呢個星球，大家唔再講fashion，而係講求身裁．例如今季流行圓潤身裁，下季流行骨感．同fashion唔同，每次轉身裁都要攪幾個月，於是公事生意長攪長有．至於衣著就反而冇咁重要．

唔著我可唔可以帶呢個idea返地球?到底呢度仲有咩?想再留响度．

三個外星人 - Part 3 : 外星移民

Part 3 : 外星移民

就係咁，睇外星人解剖o既晚上就變左俾一個同事帶在去一間唔知係點o既房，仲話帶左我去外星．如果真係咁易，我估美國人一早已經移民在去外星．係假o既，我諗．

我一直都咁諗．直到房門再一次打開．

房門外是一片橙色的光．附近已有幾個人站著．而服飾似係簡便太空衣．正在慢慢走過來．身旁的Kate已主動地走向他們握手擁抱．不過，奇怪的是，他們似是沒有對話．我走近去看，Kate真的沒有開過口．當Kate發現我在身旁時，以手勢示意介紹我．約有兩三秒停頓後，Kate似是忽然醒覺．

「呢個就係之前提過o既亞平」Kate這樣介紹我．
「你好，我係Edwin」站在最前的一位介紹自己．

目前為止已不是第一次．Kate似看透一切．「好多情況之下我地都明白對方想講」
「即係心靈感應？」唔怪得之佢好似知我諗咩．
「同你諗o既有D唔同，我地慢慢會帶你去了解呢個星球．」Edwin同Kate一樣，知道我諗咩．「不過請你暫時唔好再諗關於我身邊呢個女同事o既野」
我只係望左佢幾眼啫...

通常我地同初次見面o既人都會了解一下對方身份、興趣．但係佢地問都冇問．
「其實我預先做左關於你o既報告」Kate解開了迷團．
「我o既報告?」
Kate似是嘗試轉話題「而其實你都可以好似我地咁，如果你想留底」
「我地明白你對目前好多事都唔滿意，或者呢度會係一條出路」Edwin開始入題．
「我冇唔滿意，我每日都好充實」雖然知道抗辯沒有意思．
「所以，等陣會帶你去睇一睇返工狀況，見一份工，跟住Kate會帶你去睇一睇呢個社區係點．」
「你地都要返工咩?」
「咁唔通好似地球D戲咁，外星人淨係侵襲其他人，唔駛食飯」
「點解你地會對我有興趣?」
「我地星球歡迎任何移民」

三個外星人 - Part 2 : 唔係好似我地諗咁樣

Part 2 : 唔係好似我地諗咁樣

「我個客廳去左邊?」
「咪响原本o個度．」Kate還是平常cute cute地的Kate．「只不過用摺疊空間形式暫時將停响四次元空間o既太空船連接你個門口．唔通成架太空船泊响你窗口接你咩?」
「太空船?咪玩啦，幾張Designer Chair就話係太空船．仲有人地美國都話冇錢造穿梭機，你點會有隻太空船．」
「我成日都要飛嘛．」
「我地一個禮拜見5日，你點會成日飛」
「要返屋企吖嘛．」
「我舊年咪送過你番屋企囉．」
「都唔知由邊度講起...今次返去，又諗起你都想離開，不如就帶埋你去．話唔定你會想住果邊．」

真係好似响萬里迷霧．又太空船，又返屋企．「好喇，我原全唔知你講繄咩」

「咁你就慢慢聽．我，係嚟自米特來亞．離開地球400光年o既星球」
「咩話?」Kate今日實在神化．
「你聽埋先．其實好普通，你身邊都有好多人好似我咁．如果我唔講你都唔知，係咪?」
「外星人唔係好似今晚電視解剖果隻...個咁樣咩?」
「如果係咁，你估我仲可以同你做同事?雖然相距400光年，但係表面上我地相似．不過到步就會知多D．」
「到步?400光年喎?死10次都未到喇」科學常識告訴我．「仲有，我唔知你點解話我想離開．我依家就要行出呢個門口返去我間房」

我走去推門．一試再試，都推唔開．

「你唔係成日就想中六合彩，可以唔駛再返呢份工?」Kate在背後問．
「有邊個唔想」
「你唔係成日都『蔑』D人又蠢又無禮貌咩?」
「...」
「你唔係好想有機會住响第二度?」
「...到處都有咁o既人啦．點解要揀我?」
「唔係我揀你喎，你唔想o既，唔會入左嚟．」
「我唔可以無端端消失．」
「你唔會消失喎，我地唔係打算綁架你去外星．而且，你可以用呢個電話同朋友用email聯絡．」

忽然房間內傳來音樂．

「其實好多事都唔係好似我地諗咁樣．就好似，我地好快就到喇」Kate解釋．

三個外星人 - Part 1 : 度門响後面閂埋

那天看解剖外星人電視節目，發生在我們的祖國

上一次有類似節目已是10多年前的事．這次，我們偉大的祖國繼送人上太空後又一超英趕美的里程碑．對我而言，並不重要．工作以外不想動腦筋．

工作，就是睡眠以外的全部．

這刻，電話響起．是同事Kate．

「在看電視嗎?」Kate問．
「對呀，要看看外星人的腦袋是怎樣．有公事找我？」
Kate稍遲疑後問
「你打算要離開嗎?」

怎樣熟的同事亦不能算是朋友．縱使是給工作壓得透不過氣．

「怎麼會，出去都揾唔倒啦」
「唔係講公司喎」
「放假離開香港?，我都想」
「係離開地球」

平時Kate講說話都好正路．正在盤算是甚麼一回事時，窗外強光一閃．

「到左喇」語調仍然是平日的Kate．

雖然摸不著頭腦．但仍按不住好奇心．走到窗旁看，外邊甚麼也沒有．

「係為左攪氣氛啫，入口响門口」
「我都知門口係入口，不過出面係廳．仲有，你今日有咩事，同平時唔係好同咁」
「我只係覺得咁樣啱你，都只係需要打開門就知」
「如果冇咩，你要請我食飯」

門口出面係廰．理所當然不過的事．

「嗱～」正準備揶揄一番，一邊打開門．門外邊變成一個陌生空間．
「...我D睇緊外星人解剖o既屋企人去左邊?」

「我就响入邊等你」Kate似是沒有聽到我的問題．

到底是甚麼一回事．我只係想繼續睇解剖外星人啫．我閂番門，再坐番响電腦屏幕前．

「Kate，我依家好忙，星期一番公司再傾」沒有等Kate回應就掛線．不過，始終心緒不寧．行行企企一陣後，還是忍不住再打開門一次．而那個陌生的空間依然存在．

離開地球?真定假?離開左番唔番到嚟?點解Kate會咁講?就好似有一度力拉我入去咁．度門就响我後面閂埋左．我，就响呢個陌生空間入面，冇得再睇解剖外星人．

小創作：頭條

富是一個普通上班族．

就連煩惱都很普通．不過他消除煩惱的方法有點與別不同．甚至讓自己沾沾自喜，就是看報紙．
這是自中學時代的一個習慣．

跟普通年青人一樣，家裏總是每一兩天吵一場．未成年就是沒有權利去改變這個問題．不過，那一天中文科老師要他們閱報做報告．頭條是家庭暴力滅門慘劇．雖然報告中沒有寫，不過富那天睡得比平日好．就似有人幫他出了一口氣．

開始工作後，富在銀行工作．同事都覺得富很好人，又沒有脾氣．就算有甚麼不滿亦只是默默耕耘．當工作至夜深，富會拿出當天的報紙，單親家庭母親成車禍亡魂、隠形富婆一夜破產等，富邊笑邊將報導剪下來，似廣告裏拿著紅簿仔會綻放笑容的主角一樣．

富以為每天都會有這一個屬於自己的樂園．

那一天，報紙頭條是：「和諧－新聞審裁機制檢討中」因為報導比以前的更血腥，政府提出要收緊尺度．而還沒有待法案通過，富愛看的繪聲繪影報導和圖片已不再出現．變得只有單純的數據和基本資料．富在公司聽到同事在討論時起初不大相信，誰然同事們反應各異，但對他來說是晴天霹靂．

那天起，富如常的工作，不過負面情緒每天在累積．富一個人留下來加班時，滿腦子都在想著白天的工作中誰得失過他，是誰讓他活得這樣不快樂．他渴望能看到別人的不幸，特別是他的同事上司．終於他決定要行動．

之後某天的頭條，「毒三文治殺五人　疑兇含笑落網」當然，是沒有詳細形容和圖片的．


後記: 昨天看到青年自製炸彈的新聞，發覺富並不怎樣特別

名古屋一個窿:文法老師

記得有這樣一個老師．

她是教文法的，為了讓課堂變得有趣．在講過一些文法例子後，她常談天說笑．告訴我們自己的女兒大學畢業後的生活，自己留學和旅行的經歷．特別是關於留學體驗的部份，對我而言頗有趣．然而，對只是想著下課後到那裏玩的同學而言，有點對牛彈琴．而且相比之下，另一位老師會以同學的特質來編例句，如敎「真受不了」這文法時會作出「黃同學常常上課時吵過不停真受不了」，更受大家歡迎．

下學期沒有再上這位老師的課，只是，學期中時有同學說她的課只是「吹水」，拖延了上課進度．心裏不明所以，在忘於應付考試的日子沒有放在心上．

再次有機會跟這老師對話是畢業禮後的酒會．她剛從摩洛哥回到日本．同樣愉快的聽過她的經歷後，沒料倒她說，覺得自己不再了解這一輩學生，或許是時候不再當教師了．當時，我告訴她我享受上她的課．但事後想，或許她是對的．另一位老師就曉得如何讓學生開心上課．最重要是，懂得甚麼時候要退．

小創作:電梯的緊急制（四）

「快D睇下」亞聰向亞明叫著．轉頭又再睡著．
明走到控制台前，發覺，又是同一部．看著鏡頭，又是同一個男人
「又有咩事」這男人是在玩嗎?
「唔好發脾氣住」
被這樣一講，亞明更是氣上心頭．不過這次，男人很快就回應了．
「係呢，你地反應都好快，都冇10秒就回應」
就算係公司派黎都冇咁夜，不過，真係摸唔清個男人攪咩「咁都可能同人命有關」
「咁又係，如果我死左响度，都好麻煩」
「咁，今次有係咩事?」
「其實...你地係做咩」
做咩又同你有咩關係．亞明實在是沒有耐性同佢糾纏「我地好多野做」接著便準備離開控制台．
電梯的緊急鐘又響起．這次，沒有等亞明回應，對方已在講話．
「你仲响度?頭先麻煩左你，唔好意思......頭先入果陣，見到個對講機，唔知點解好想同你傾下偈．雖然我唔知你係邊個，亦都冇見過你．

不過，真係好想傾下偈．就算係一兩分鐘都好」

說罷，電梯開始在動．

第一 / 第二 / 第三

小創作: 關於 - 不能為自己做的事

首先，題外話．

希望在這段時間可以繼續寫故事，所以，就將所想的題材寫出來，觀迎各種感想/意見．

好，言歸正傳．

－－－－－－－－－－－－－－－－－－－－

所謂「不能」，可以是「千萬不要」，可以是「不可能」．這點暫不定論．

想到的，是「為自己一輩子做一個結論」．

就像畢業、結婚，或多或少都會為自己作一個結論，目前如何，之後要怎樣．諸如此類．那麼，在自己離開這個世界之前，需要嗎?或者，最不想見到的，像明星離世時一樣，忽然多了很多朋友，忽然變了聖人，變了信教，變了香港精神......　

可以的話，我會希望人生沒有遺憾．當中包括可以用自經理想的方式離開，離開時的儀式等．若果可以，最好重可以理一理單，睇下有咩未做，比如係駛晒所有錢，睇番一D好耐冇見o既人（舊情人?!），睇下有冇咩做錯左...

基本上，以上的都不可能做到．因為，我地唔知道自己幾時走．而就我自己而言，可能係千萬不要做．萬一，回頭一看，發覺自己一韃糊塗，而原來身邊的人都一直在忍耐...