幾回味 ：精緻點心

原來蔡瀾笑唔笑真係代表左間食肆好唔好食。

呢間响九龍城o既食肆，朋友推介話手工一流。果然，如棉花糖小白兔，甘荀型咸水角，又有創新的炸魚柳腸粉。

之不過，味道味，不是不好吃，只是較喜歡傳統如大榮華。而且，不用等大半個小時。

幾回味：香港名物

去台灣買鳯梨酥，去上海買火腿，咁香港買咩嘢食好?

給外國朋友問起時，起初也會想不起。其實，買得走的可能不多，但好吃的多得很啊，就如出爐蛋撻。而最近吃過由灣仔快樂餅店出品的。

近下午5時經過，蛋撻剛出爐，獨特之處在於不太甜，吃完後覺得剛剛好，不膩。

對蛋撻的情意結，還在於由細食到大。

那時候，偶爾亞媽會在放工時買一盒回來，剛好一家人會人一個。道理跟60年代成長的日本人喜愛吃香蕉一樣，小時候吃甜的機會不多，蛋撻是其中一樣。到自己開始做part time補習，偶爾會在工作前後用兩蚊買一個奬勵自己。

現在吃甜的選擇多了，不過，遇到蛋撻出爐的機會卻少了。

幾回味：食蟲蟲

紅磡一家開業不到一年的酒店，有全港首個室內垂直花園。

之不過，在花園底下的餐廳吃飯則可能食蟲蟲。
跟一班朋友一起吃飯，起初不為意，但見他不停的在揚手，原來，在他的餐巾上，有好幾隻小小的草蚊。找服務員幫忙換個位置，之不過，還是一樣。

但奇怪的是，七個人當中只有他一個吸引到蟲蟲。

幾回味：西貢的斯里蘭卡

講的是一家餐廳，食評似乎不錯。

口味有D似印度，但冇咁濃。
特別D o既有炒薄餅，將薄餅撕碎再混和香料、肉、菜，很有咬勁。8%的斯里蘭卡非常易入口，唔飲酒可以試下香蕉lasi，很滑。

有時間，會提議你下晝去清水灣游個水，又或者揀由馬鞍山行到西貢(約兩個鐘)，六點零去歎一歎呢間餐廳。好多時去外國旅行都係咁o既行程。依家去西貢就好似去左旅行咁喎。



地址 :西貢海傍街14號地下

幾回味：沙田蘋果批

終於嘗到聞名的沙田蘋果批。

賣點：用本地蜂蜜。

剛剛選擇了坐下來吃。加熱後餅皮香脆，但又比普通蛋撻皮多一份咬勁。蘋果似乎混合了青紅蘋果，甜而不膩。

其實這家店就在距離公司不到5分鐘車程，只是一直沒這份閑情。今天覺得好吃，或許是也是因為可以輕鬆的坐下。

地點：大學鐵路站旁的酒店

早上11時及下午5時出爐

幾回味: 日式咖哩fans,請留意!

日式咖哩連鎖店CoCo壹番屋，終於登陸香港喇！
位於觀塘apm商場旁的鱷魚恤大廈．由於舖面唔算大，晚市時間都要等十多分鐘．不過同日本唔同，唔係自助式快餐，服務及裝潢都較近Pokka級數．
同日本唔同，標準飯量較日本多100克，加辣又唔駛錢．值得推介係，加$25就有齊餐湯、沙律、餐飲同雪糕！(お得！)

幾回味：好似雲石咁滑

好似時光倒流．

中學年代，會跟同學由山上的學校走到碼頭附近的街市，鑽到小販檔後排的這家店．用兩三蚊食一碗豆腐花．

再到這家店，才發現原來這家店好懷舊，就好似粵語片中看到的．
望向廚房就可以看到造豆腐的工具，另一邊的嬸嬸，似是閉著眼都會包煎餃．就似是停在當年，專心一意的去做他們的主菜：豆腐．

有煎釀、有腐乳、更有豆腐花，好似落雨天o既雲石咁滑o既豆腐花．當然，仲有係氣氛．小店，街坊味．

點去?北角馬寶道街市，北角地鐵站渣華道出口走5分鐘．

幾回味:食要食出名o既

早一星期帶兩個背囊友找地道一點的美食，最後選定他們酒店附近的筲箕灣東大街．

正餐過後，又去找他們喜愛的芝麻湯圓．在電車站附近看到熟悉的名字：大良八記．

實而不華的裝潢，價格相宜．一行幾人都決定要湯圓．

「有兩個要煮喎」

還以為有機會看他們搓湯圓．沒料到...他們拆包裝，是買回來的行貨！而湯圓送到咀邊，煮太久了......皮軟得快要化開．記得早前自己在超市買的寧式湯圓都要比它好吃．

畢竟，這家舖有名的是糊，不是湯圓．失望也是理所當然......

我自己:煲仔mania

這陣子愛上了合時的煲仔飯．

怎樣才適合吃煲仔飯? 第一係夠凍，最好係10度左右．第二係要夠肚餓．

有咩咁好食?老土D講，有飯香，有飯焦，若果炭燒仲有多一陣風味．

選擇方面，要括出去啊．都是高膽固醇的好吃．臘腸臘肉豉油......又肥又好食
好喇．點食法? 聽聞如下：

• 點一款你鐘意
• 叫一個凍飲
• 當飯黎到，唔好開蓋．沿著蓋邊倒豉油
• 等5-10分鐘
  

據講，咁樣會易D起飯焦．

要食，當然要揾間有風味o既舖頭．早陣子到紅螞蟻吃「燘飯」，也是用沙煲去載，但飯是煮好後才放進去，當然沒有飯焦，完全不是那回事......

要好吃嗎，有以下地步供參考：

• 佐敦: 地鐵站附近．寶靈街與廟街交界，向佐敦方向有兩間地舖．你會見到邊間多人D．賣點:夠火喉
• 銅鑼灣: 登龍街．只有一間．賣點:炭燒．夠飯味
• 旺角:金星戲院與neway之間的地舖．賣點:有煲仔公仔麵
• 牛頭角: 下村，雲興隆．賣點:夠街坊，2008年尾就拆

幾回味: 韓式快餐

吃韓菜不一定要去尖沙咀的韓國街．早前恰巧經過蕪湖街，發現有一家叫韓國快餐(或Dosi...好像是韓文叫「都市心」)食品製作頗認真，50蚊左右的定食，有一個石頭飯，加8款前菜．前菜包括煎魚、泡菜、煎蛋、豆卜、大豆芽等．十足韓式風味，吃韓餐的賣點之一都莫過於前菜．

石頭菜本身嘛，賣相已值3分．味道亦可以．美中不足是飯焦不夠．但那可能是我在飯來的時候過早把餸菜拌勻．在吃到底時才有薄薄的飯焦．

如果這還不滿足，店來更播放著Rain的演唱會DVD...

地址: 紅磡蕪湖街近83號...

嘆世界:牛脷

友人講得好．日本的名勝與名物都有點「整色整水」，就像仙台的牛脷．

牛脷其實不算甚麼，當然比不上各式各樣的牛排，在戰前是沒有人吃的．因為那一代日本人經歷過糧食短缺，以致物盡其用，將牛脷變為一味菜．而經過數十年，牛脷更變為遊客必吃的香口又有咬勁的美食．而夜機到達的我更無縁吃到他們的鎭店極厚牛脷，然而，一般的亦有炭燒和味噌兩款口味．

那麼，我們的「碗仔翅」可否成為名物?小時候沒有太多機會食翅，然而在放學時在碼頭的小販檔氣一碗碗仔翅真的是非凡享受．同樣不是甚麼貴重物品，只是粉絲瘦肉加湯(或味精...)，很有潛力打造成香港名物...

幾回味：法蘭度的異國風情

又一廉價推介．當然，所謂廉價是相對的．今次是廉僄的異國風情．

相信你都會覺得，距離我們一小時船程的澳門在保留歷史方面比香港做得好，所以，那裏更易感到中葡交匯的氣氛．就好像這家在黑沙灣的法蘭度．

因為在沙灘旁，因為沒有冷氣，因為一次外藉人在當侍應，因為沒有太熱情的菲律賓人在奏樂唱歌，沒有跟鄰坐零距離，一切都來都很cozy．

當然，更重要是食物的選擇．


朋友推介這裏的飽和燒豬．這裏的餐前飽都是新鮮出爐．外層脆，內裏鬆軟．就是簡單的配搭牛油也很好味．我想，若果在歐洲旅行時吃到的法飽都是這個質素，那我當時就不用為了慳錢而每日食到咀都損...

燒豬外還點了沙律和沙蝦．都是很簡單的烹調方法，沙律只是加了檻欖油，而蝦就是加了一些秘製醬料．好味在一個字: 「鮮」

新鮮的生菜番茄沙律


炒大蝦，好味得食指大動


你可能會問，為甚麼沒有影燒豬，那是因為食過炒蝦後已滿手是油，想睇就要自己試下


p.s.: 好奇怪，位於澳門黑沙灣的法蘭度，牆上的裝飾竟是印有香港字樣的水泡...

幾回味:廉價的温暖

係打邊爐．

跟同樣平價的大家樂「一哥火煱」唔同，吉野家唔賣大堆頭，而係有D質素o既食物．

39蚊o既餐，個煱有冬姑、魚彈、豆腐、金菇同烏冬，加埋牛肉、miso、温暖o既白飯同埋芝麻醬，份量固然足夠食飽兩次．口感亦值回票價．

一般打邊爐D豆腐都「鞋」口，難得今次食到o既係有少少食豆花feel．牛肉嘛，一貫吉記的半肥瘦牛肉，再配埋芝麻醬，簡真係邊爐絶配！不過，登登燈櫈，最重要當然係個湯底．今次試左個濃湯底，個湯竟然有D似青紅蘿蔔煲豬或牛肉，略帶甜，同D野食夾到絶．

比起大家樂的一味大堆頭但有時如食擦膠的質素，39蚊的吉野家火煱確係贏半條街．

p.s. 食完都真係飽得緊要，畢竟係食左一碗飯加一碗烏冬，要有準備先好去食

幾回味: Doraya...

要以大眾價錢食到有丁點日本水準的葱吞拿魚腩飯, 銅鑼灣的Doraya是一個好介紹.

先從店面入手. 只有不到20個座位, 狹窄的店舖陳設有丁點「站前小吃」的風味, 店內說著日語的顧客更是增加氣氛.

食物嘛, 葱吞拿魚腩飯為朋友所推介. 坐下來二話不說便先點一個定食. 不知是否這選擇太熱門, 不消幾分鐘己在面前. 魚腩的分量充是, 跟飯拌勻後令飯泛起淡粉紅色, 加上專為吞拿魚而設的醬油, 吞拿魚在口中滲出點鮮甜味, 這該是因為來料新鮮.而且, 魚沒有同級食肆中常有的雪味.

前菜的茄子和蛋亦為這個定食加分. 蛋固然是水準之作, 難得是「一口茄子」配上醬油亦是異常醒胃.

美中不足的這食肆不設預定, 更要齊人才能入座. 週未飯市到訪的話要花點時等位.

地步: 銅鑼灣駱克道451號地下(近銅鑼灣廣場二期)

幾回味:千両

元氣响ifc開左間高級Do既迴轉壽司, 叫千両. 賣點係D料好D...

結果? 有幾款係真係好食D, 如腐皮壽司就因為加左薑絲同芝麻變得好食左. 不過, 好似吞拿魚壽司, 因為要靠D料新鮮先至好食... 始終都係一般.

提提你, 仲要排成個鐘先入到去... 自己諗諗啦.