小創作: on and on (2 / 2)

第五 (觀眾)

「唔好氣餒喎」留言o既,係當初問我有冇blog o既網友.

心感安慰,起碼我唔係對空氣講野. 心情好左D,出去逛下商場.咁「橋」撞倒一個中學同學.「唔得閒都同大家見過面打個招呼」原來今晚同同學聚會就o係呢度.之前都唔想去,點知都係避唔甩.

只係10年多D,個個都唔同晒,有「身光頸靚」的,有提早步入中年的, 大家坐下來, 不像剛畢業時不斷在考專業資格.意氣風發的都在講炒樓炒股,賺幾多.就係怕會係咁場面.還是盡快打完招呼離開.

「我呢期都追睇緊一個失業blog」亞芬.中學時的班長.原來最近半年都失業.席間即時有兩三個人表示有追看.其實都有衝動話個blog係我寫.但三思後都係盡快離開.


第六 (熱爆)

雖然只係幾個人,但係都有D飄飄然.唔怪得之咁多人恨做明星. 打開電腦想繼續寫之際,發現有好多人留言鼓勵.仲有雜誌email約我做訪問.

「對於人稱『失業紅人』呢個現象,你點睇法?」原來,有幾個forum轉載左我個blog,近一兩年又有為數不少就業不足同失業大軍.認為我個case代表左呢個世代.雖然我唔知點解吹得咁大. 個記者就話外國有好多人寫blog發達,又問我係咪多年來堅持理想.仲鼓勵我出書添!

佢講開理想,我先諗起早排執屋睇返細個留底o既作文.細個果陣我話自己想大個都講古仔.唔通真係可以靠講古仔養自己?原來我咁樣返左咁多年工就係等今日.

我一邊幻想將來會點樣飛黃騰達,一邊開始諗計令個blog寫得精采D,公司打黎叫我做freelance,有見工機會,都成為我個blog內容.而同時,開始有email寄黎提議事情應該點發展,如應該如無線電視劇般有三角關係等.我開始覺得自己係一個專業作家,仲係紅果隻.


第七 ()

如是者半年,公司當然冇freelance,不過好在有寫blog. 又有讀者.當稿件累積到一定數量之後,我決定打電話俾之前訪問我個記者.

「唔知你有冇法子幫我出書」

有佢幫手搭路,實掂啦! 點知,到頭來佢只係俾左兩三個出版商聯絡方法我. 直接聯絡過他們後,轉眼又過幾個星期,送稿後都冇迴音. 難得十幾年都未試過咁上心做野,我決定自己出. 仲搭到路去書展擺.

結果,在書展賣出了10本,都是一些forum上認識的網友.「其實好多人想支持你,不過大部份文章我地都?網睇過,而且又仲?緊工」

在書展收拾的那天, 一個書商告訴我,坊間有幾個同類形blog.叫我可以參考下.據說,其中一個係專業作家化名寫的.

倒頭來,還是要重新開始

小創作: on and on (1 / 2)

第一 (想做咩?)

「大個左要做咩?」小學三年班的老師問
「講古仔,畫公仔」我這樣回答.

「點解你會想教書?」
「講o下講o下又一日,又多假期,又早放工,仲年年都只要講同一份note」初中年代跟死黨說.

「點解想o黎做?」
「我好鐘意寫program嫁!又覺得份工作好有挑戰性」第一次見工時這樣回答,唔通話當時最好pay係佢咩


第二 (Office生活的最後一天)

「你俾我中左六合彩,睇下仲見唔見我?」我這樣的回答這位剛轉組、才畢業半年的同事.

帶著他在office走,正要介紹眼前的同事,才發現忘了這位採購同事的名字.在裏5年多也沒講多過半句,難怪.

一班同事正在討論網上購物流程,不同情況的處理,看來有點hea. 互相介紹後, 當新同事想發言之際,秘書進來叫大家開臨時大會.心想,慌唔係老闆又有咩新idea,一切推倒重來咩

「因為經濟氣氛急轉,公司將專注發展投資,網站開發將轉以共同開發模式」好聽D,全部人即時變為公司partner,實際D,就係freelance,有job時公司就call我地,冇job就你死你事.

枉我仲忍左咁多年留底咁耐.


第三 (得閒)

公司個幾星期都冇job,返緊工時就趕趕趕,而家就忽然攤咁耐.

一時間多咁多時間,都唔知做咩好. 平日想唔駛做,但30出頭就早左D.唯有日頭自己一條友逛商場,夜晚就上網hea下.

平日減壓都靠shopping,不過依家齋睇,不到一星期已膩.某日去麥記過日神,旁邊的媽媽品神咁叫個小朋友做功課,小朋友點左亞媽去買野,我話俾個細路聽,讀左書都唔代表咩.哥哥大學畢業,結果都唔知自己做咩.點知小朋友仲醒過我,「我好清楚嫁.咁依家要靠屋企養嘛.你呢?悶到要撩細路傾偈,攪咩」

攪咩?我咩都唔想攪.

返屋企上o下forum留言.有網友見我成日留言,問我有冇blog,佢話佢都寫緊個旅行blog.我都想寫下自己點樣風花雪月,但係我連食飯都揀下午茶時間買埋兩餐...

「咪寫下失業囉」

我係freelance,唔係失業...


第四 (失業blog開張)

第一篇: 「freelance的生活,每天都等待挑戰 (句號)」

第二篇: 「freelance繼續在等待他的挑戰.十分期待」

第三篇: 「freelance的挑戰.原來是對未可預知未來的等待」

真係寫寫o下先發覺自己唔記得中文點寫.中五以後都唔駛寫. 題目就仲唔知點.第四篇到底要寫咩,總唔可以十篇都期待.今日發生過咩事?咪同之前一日一樣...

第四篇: 「freelance主動出擊,打電話到客戶公司問o下有冇job,但係唔夠5分鐘就俾秘書hea走......其實我唔應該咁傻打番去.」

不如就寫下見工經驗?

第五篇: 「freelance想了解市場,決定扮見工.上網睇睇,原來依家咁多巧立名目o既資格...」寫寫下,第五、六、七篇, 講下點過日神,又講下點揀工, 點寄求職信,又點樣石沈大海.

某天電話響起, 「今個禮拜方便黎見工嘛?」終於有工見.都四五年冇見過工,似樣D o既西裝都冇一套.到場仲慘.又緊張,又要講幾年都冇講過o既英文,最慘仲係,對方又嫌我貴又嫌我D skill outdate晒.

其實佢有冇睇清楚我份CV嫁,唔請咪唔請囉,駛唔駛踩得咁盡.就係咁將一肚氣寫晒落個blog度.

不過又會諗,點解攪成咁.咁多年循規蹈矩,又冇練精學懶...

(to be continued)

幾回味: 日式咖哩fans,請留意!

日式咖哩連鎖店CoCo壹番屋，終於登陸香港喇！
位於觀塘apm商場旁的鱷魚恤大廈．由於舖面唔算大，晚市時間都要等十多分鐘．不過同日本唔同，唔係自助式快餐，服務及裝潢都較近Pokka級數．
同日本唔同，標準飯量較日本多100克，加辣又唔駛錢．值得推介係，加$25就有齊餐湯、沙律、餐飲同雪糕！(お得！)

香港人:有人管都幾好

原來有人管都幾好．

週日下午，坐地鐵觀塘線往旺角方向．人迫迫，站著直到九龍塘才有座位．就是因為方向跟高度不同，才發現一直站在我後邊的男人有些異樣．

40來歲，短褲、涼鞋、T恤．面容看不清楚，因為他似乎正在偷偷吃東西，雙手把白色膠袋套在咀上．起初只覺得偷吃也不用這樣偷偷摸摸．過了一會，嗅到一種味道，抬頭一望時恰巧跟另一乘客目光碰上．大家都發現了是那個男人．正在車廂內「揩天」．由於是易燃物品，也不知他身上有多少，以立時提高警覺．幸好，到站時他已下車．

看情況他的癮很大，才會急於在車廂內「上電」．而不理周遭目光．不過諗深一層，佢分分鐘已經揩左幾十年．一直都冇人阻止，到依家40幾歲，如果唔係犯法俾人拉，又仲有邊個可以管到佢?然而，唔犯法，都可能有好多問題......

香港人：不穿內褲也要打領呔

因上海世博得知，上海人從前愛穿睡衣上街，因為在物資缺乏年代，能負擔睡衣是有錢象徵，管你是否真的有錢．

然而先敬來衣後敬人又豈只是上海專利．早前在鰂漁涌商廈區看到他．
很不明白，不是可以有更合身的工作服嗎?難道，打一條呔就提升了服務?又例如，夏天在戶外行銷的物業代理．縱使30度高温仍然專業形象，難得休息時才脫去外套，吞雲吐霧．

但倒過來，辦公室高層，特別是IT界，反而不介意一身casual look，銀行界非前線人員亦追求週五smart casual．是有錢人追求平民待遇的另一例子嗎?

B觀點: 洗少少(五) 之 買舊一季

新車落地即刻冇左一截，新衫到季中已經開始mid season sales，新電話不到半年就有零機價上台計劃．

特別係電子產品，遲買一步反而會有好處：
- 價格下調
- 有口碑
- 有咩bug都知道
- 話唔埋有新淨二手貨
比其他人先買一步，或者會高興D，會覺得自己帶領潮流，威D．但講到尾，都可能係一份虛榮．其實可能只係俾氣氛(或廣告)感染．靜下來反而會想清楚自己到底是否需要．

洗少少　貼士五: 可以遲D買的，遲下先買

更多貼士
洗少少(一) / 洗少少(二) /
洗少少(三) / 洗少少(四)

幾回味：好似雲石咁滑

好似時光倒流．

中學年代，會跟同學由山上的學校走到碼頭附近的街市，鑽到小販檔後排的這家店．用兩三蚊食一碗豆腐花．

再到這家店，才發現原來這家店好懷舊，就好似粵語片中看到的．
望向廚房就可以看到造豆腐的工具，另一邊的嬸嬸，似是閉著眼都會包煎餃．就似是停在當年，專心一意的去做他們的主菜：豆腐．

有煎釀、有腐乳、更有豆腐花，好似落雨天o既雲石咁滑o既豆腐花．當然，仲有係氣氛．小店，街坊味．

點去?北角馬寶道街市，北角地鐵站渣華道出口走5分鐘．

香港人: 擺post死

偶然從書刊看到舊照片，實在驚嘆於時代變遷，就以他們的姿態為例．

若果是明星的話，可能會像他．

(相片來自http://www.re1001.com/)

偶爾看舊相，不論是自己或是別人的，可能是從前羞於在鏡頭面前擺姿勢，相中人都是面容以至四肢繃緊．不過，現在講求自然，就算以往一味講求優雅的結婚照也好，也變得可以有大膽的「垂死美」

名古屋一個窿：你有冇教科書

跟同學分享戰果，當然有一些一見成功．但更多是食白果．其中一位香港同學更搭車到機場見starbucks，諗住會講英文有着數．結果係：「你都要用日文介紹咖啡俾客人喎」

如是者，兩三個星期無起色，又見同學揾左兩個月都一樣，人窮志短，放棄要講日文，只求賺外快．上網揾麥記，做廚房．

登記後兩天的晚上，收到電話．是麥記!

人生日最喜歡麥記的日子，除了小時侯第一次食薯條以外，就是這一次了．用甩甩漏漏的日文回答，起初的跟會話課學過的差不多，直到中段，對方問我有沒有教科書（きょうかしょ）．不思不得其解，為甚麼忽然對方會關心我的教科書．花了很久，返覆再問，才知道他指的是許可書（きょかしょ）．是長音短音的分別．

掛斷電話後看錶，講了近30分鐘．

得到安排見工固然高興，能夠跟一個陌生日本人講足30分鐘也是一件令人很高興的事．

名古屋一個窿:沒有免費的donut

由上班族變返學生，其中最唔慣就係冇收入．

冇收入，點都會少D安全感．買咩都會諗過度過．特別係，到步兩三個月間，日元升左一成．

响日本讀書，可以合法番part time．而事實上，幾乎大部份人都會．只不過，要等三個月，先有工作許可証．

經得當年一到六月，轉堂和放學後同學都會在講揾工的經歷．townwork(其中一本日文版Recruit)、上網、求職中心、朋友介紹．就好似當年大學final year一樣．唔同o既係，大家都係廉價勞力，揾o既都係零售、食肆．記得有師姐話有人試過返麵包舖，每日收工可以帶賣剩o既番屋企．(唔知返壽司舖，會唔會可以帶壽司走?)

起初都有D幻想，以為自己有工作經驗，話唔埋可以揾倒office工呢?可以練日文，又可以舒舒服服咁賺錢．到開始揾，發現根本冇可能，因為office工要平日日頭返，除非預左唔再上日文堂．退而求其次，「coffee shop都唔錯喎」某日放學經過starbucks時忽發其想．又乾淨，又簡單，又唔駛洗厠所．再唔係喜愛o既Mr Donut都好吖．食唔晒又或者可以帶走．講到尾，都係想嘆D．膽粗粗咁就打電話應徵．

上會話堂時已經練過見工要點講．又聽過D公司會點樣耍D留學生，比如話啱啱請左．不過，講了一兩分鐘後，對方已用很日本人的方式答：「因為工作主要是要對客戶，以你目前的對話就...」

被婉拒了．

只好等減價日才付錢吃donut.

香港人：請別把車廂當屋企

「請別把車廂當屋企」

有時覺得，車廂廣播應該加埋呢句．

在香港，不難在巴士地鐵上見到有人剪指甲或「腰鼻」．更甚的不會善後，又或是隨處黏．

是習慣吧．總不可能是因為太忙沒時間在家裏處理吧．到底，他們可不可以改一改?

名古屋一個窿:最緊要你開心

回想起來，覺得第一個學期很幸運．原因之一，是遇上畫紙背後的這位老師，
每個人心中有把尺．常有同學批評一些教學認真的老師，指他們沈悶、唔知講咩．而我所講的這位好老師，過人之處是，教學多年仍能設身處地明白留學生心態．

記得跟老師熟絡後，讚他的課有趣．他說：「當然要有趣啊．文法本身已經夠悶，若果教的方法也悶，怎叫你們提得起興趣」而且「留學生一個人離鄉別井，要適應新生活已不簡單，若果連上學也找不到樂趣便很難過」

後來才知道，要當日文老師，先要到兩個不同語言地區實習．這話老師就試過到澳洲．

此外，他的例句鬼馬，不是課本的行貨例句．比如，學逆接時，會有例句像「黃同學雖然聰明，但很多嘴」哄得滿堂大笑之餘，大家又容易記住，又叫那沒法停止講話的黃同學安靜了好幾節課．到下學期，能力試前的課程緊密，他也會花開始的幾分鐘攪攪笑．如，講講他對當時流行的香蕉減肥法的經驗．

對比其他老師，他的課堂份外好玩．試過分組問答比賽，贏了的有小禮物．我就試過收到咖哩味汽水．雖不算貴重但誠意十足．又試過會話班與別班對壘，要我們用日文解釋遊戲規則，有得講又有得玩．

相信他花不少時間準備，為的是大家開心．令在學校內的時間過得愉快．或許，我們上班也要有這一份心態．

B觀點: 洗少少(四) 之 借來的快樂

早兩年Wii推出時，也曾因廣告洗腦而想買一部．跟朋友講起，起初他還會一家人玩，但近日那部Wii已處於冬眠狀態．還問我是否想借? 借? 好呀～

記得大學時代也是一樣．住在宿舍，有漫畫一齊睇，有機一齊打，有宵夜夾份一齊買一齊食．想要的東西，不一定要真金白銀去買的．若果，你不介意好似有D cheap．用internet世代的眼光看，原來我們比他們早了不知多少年去玩分享．

洗少少　貼士四: 可以分享的，不買

更多貼士
洗少少(一) / 洗少少(二) / 洗少少(三)

B觀點:洗少少(三)

原來都算有先見之明．

日前碰見一本書的副標題為：「別為節日買禮物」．實在是再同意不過．明顯不過的例子為日本的「白色情人節」．

日本的情人已經夠絕．女生不單要送禮給男伴，若在上班的更要送給上司和男同事．以示對男仕們的「謝意」(所謂的「義理朱古力」)．而男生亦要於一個月後所謂的「白色情人節」時回禮．就是為了不知是誰訂下來的規矩，不知增加了多少的消費．
所以，要洗少D，當然唔少得要認清楚自己點解要買，為左邊個買．最少，唔係為左鼓勵消費的商家而買．

更多貼士
洗少少(一) / 洗少少(二)

香港人:得閒無事行商場

不曉得你是否也一樣．

農曆年經過商場，人頭湧湧．起初諗：「嘩！市道咁好？」睇真D，四周的人百無聊頼．坐著望天打掛的，左逛右逛window shop，總之就是要消耗時間．明明响屋企可以好好瞓，硬係要坐响商場......
當然，家家有本難諗的經．說不定就是家裏太吵，太窄．又或者，公共交通都連都商場，除了去商場，已沒地方可去． 又或者因為個天，空氣汚染指數又長期高企．夏天的香港，在戶外不消10分鐘已被陽光溶化．只能一個接一個商場的走．又或者，公共空間又已跟商場融為一體...